2Th 3 | NdeIBE | STEP | Okokucina, bazalwane, sikhulekeleni ukuba ilizwi leNkosi lingaqhubeka ngokuphangisa njalo lidunyiswe, njengalokhu okwakunjalo kini.

2 Thessalonians 3

Ukucela umkhuleko

1 Okokucina, bazalwane, sikhulekeleni ukuba ilizwi leNkosi lingaqhubeka ngokuphangisa njalo lidunyiswe, njengalokhu okwakunjalo kini.

2 Khulekani njalo ukuba sikhululwe ebantwini abaxhwalileyo lababi, ngoba akusimuntu wonke okholwayo. 3 Kodwa iNkosi ithembekile, izaliqinisa ilivikele komubi.

4 Silethemba eNkosini ukuba lenza izinto esalilaya zona njalo lizaqhubeka lizenza.

5 Sengathi iNkosi ingaqondisa izinhliziyo zenu ethandweni lukaNkulunkulu lasekubekezeleni kuka-Khristu.

Isixwayiso ngokuvilapha

6 Ebizweni leNkosi uJesu Khristu, siyalilaya bazalwane ukuba libaxwaye bonke abazalwane abangamavila abangaphili ngokwemfundiso elayamukelayo kithi. 7 Ngoba lina ngokwenu liyakwazi ukuba kufanele lisilandele njani isibonelo sethu. Lapho sasilani sasingavilaphi,

8 njalo kasidlanga kudla komuntu singakubhadalelanga. Kodwa sasebenza ebusuku lemini, sisebenza nzima njalo sitshikatshika ukuze singabi ngumthwalo lakubani wenu.

9 Lokhu sakwenza kungayisikho ukuthi kasilalungelo losizo olunjalo, kodwa ukuba sizenze sibe yisibonelo kini ukuba lisilandele.

10 Ngoba lalapho sasilinika umlayo lo: “Uma umuntu engafuni ukusebenza, kangadli.”

11 Sizwa kuthiwa abanye phakathi kwenu bayavilapha. Kabenzi lutho, bangenela izindaba zabanye. 12 Ebizweni leNkosi uJesu Khristu, siyabalaya njalo sibakhuthaza abantu abanjalo ukuba bazimisele basebenzele ukudla abakudlayo. 13 Lina, bazalwane, lingadinwa yikwenza okuqondileyo.

14 Uma loba ngubani ongalaleli imilayo yethu ekule incwadi, mnanzeleleni. Lingajwayelani laye, ukuze ezwe eyangeka. 15 Kodwa lingamthathi njengesitha, kodwa limxwayise njengomzalwane.

Ukuvalelisa

16 Sengathi iNkosi yokuthula uqobo ingalinika ukuthula ngezikhathi zonke njalo ngezindlela zonke. INkosi kayibe lani lonke.

17 Mina Phawuli ngiloba ukuvalelisa lokhu ngesami isandla, okuyilo uphawu oluphawulayo kuzo zonke izincwadi zami. Ngiloba kanje.

18 Umusa weNkosi yethu uJesu Khristu kawube lani.